和總裁食完煲仔飯回家，一進門就看到這張字條。
今日工人放假，一接呀豬放學，呀豬就話我尋日應承送一份禮物比佢，於是入了文具店選。
佢話要一本有鎖的記事簿，因為 Phoebe 都有 ，一選，就選了這本$125的 Hello Kitty 日記簿。
以下係我倆之後的對話：
豬：唔~我好想要呢本呀！
媽：你要來做咩喎，你都唔識字，等你大個識寫多的字，先買啦！
豬：我可以問家姐架o麻！
媽：咁你都問家姐，家姐都知你講咩啦，洗咩有鎖喎？
豬：佢可以知架，佢係我地o既family o黎架o麻。
媽：咁你本日記都係放系屋企，個個都係你o既family ，都唔洗買有鎖架啦。
豬：但係我唔想比爸爸睇到.....
媽：咁爸爸唔係你family咩？你想寫咩唔想比爸爸知呀？
豬：唔~~~~我想寫平時爸爸味o個o的o羅......
媽：.........
(無言，不過最後都係唔買，因為太貴. )
Phoebe受街坊朋友仔同學校影響，近來愛上了跳繩，對於這項有益身心的活動，我當然非常支持，今日在Spotlight買了條新(已經是她第三條跳繩)後，就不停跳，後來重發展到同呀豬玩雙人跳繩。
非常搞笑！
這個暑假實在太長，成日要諗方法娛樂兩位寶貝，真係救命。
前幾日，呀豬問我：『點先可以賺到錢架？』就比我諗到條好計！
Phoebe英文超班，叫她教呀豬，我咪可以慳水慳力？！
於是.........
每教一版Hooked on Phonics ~ Phoebe 得$2，如果加埋有心機讚妹妹的話就$3；呀豬比心機學，可以自己讀得番比我聽得$1.
試了幾日，都好成功，希望兩個可以繼續就好了！
呀豬這個傻妹，一係唔病，次次病親都嚇死人，今朝一早起身，就痾了一次，嘔了四次，連飲啖水都嘔突黃膽水出來，真係嚇到我鼻哥洞都無肉！
唔理咁多，一於找佢睇開個兒科，楊寶琪醫生。
這個醫生由呀豬兩歲幾第一次入院時睇到而家，由於佢份人病到就來死都會忍住，重會照食照訓，所以十分得人驚，唔敢睇普通的街坊醫生。命仔緊要，所以唯有睇開o的錢。
貴都係有原因的，除了地點方便之外，重好大地方，有好多玩具，也有個大電視長期放Disney Playhouse Channel.....等等，去按撫家長的心理.....嗚.....
醫生留意到佢個鼻有些損了，發現佢除了氣管敏感外，重有鼻敏感，所以開埋鼻敏感藥，有需要時服。咁就千幾銀，真係無奈.....
前幾日行吉之島十蚊店時，買了頂草帽，之後執床下底時，又找到個毛毛狗公仔的盒。
呀豬就係靠這難件度具，自創了一個英國少女的造型，佢本人是十分之enjoy，重行到扭扭下，十分搞野，我也配合一下她，不停讚佢可愛、斯文同好靚之類，令佢有上了身的效果，同平日扎扎跳的她剃若兩人。
請各位慢慢欣賞：
今日同兩個女出旺角巔足一日，難得的是今次竟然是兩個陪我買嘢多過我買比佢哋。
兩個咁乖，梗係要請佢哋食雪糕啦。
你睇，兩個望住耳環的笑容，是由心而發的，女仔即是女仔o麻！
一人帶一個小盒，內裏有個人手提電話、毛巾、八達通、書及一隻貓...！
行累了，就到了意粉屋吃tea，一邊吃，一邊我幫兩個小主人帶上剛買的手練、耳環、好開心呀！
我o地一齊Cheers！for the Girls Day！呀豬最鍾意系屋企搞呢搞路，尤其是係搬來搬去o的椅椅，佈置自己o既小天地。
今日我就見佢好辛苦咁搵張被想整個小帳棚，咁我就唸，不如比個巨型攝影棚佢玩啦！
大家睇佢玩得幾開心！
所有佈置都係佢自己一手一腳。
重有兩隻小動物看門口，又會安排埋食物o忝！
明知是酷熱警告，但為了不讓兩個小朋友失望，都膽粗粗一拖二去暴曬。
又帶公主裙，又帶泳衣，又帶便服，重有傘、水、小食、鞋、外套、太陽油、相機、鏡頭...
老公話我咁辛苦都唔知為咩，但係我唸我重有幾耐日子可以咁帶佢o地去玩呢？
而且童年好快就過，遲o的你叫佢去陪您出街，我唸都好難，點解唔系自己可以的情況下盡量做多o的？
男人當然係唔會明，個個細路女都會想過自己是公主的時候，尤其喜歡打扮到好似一個小公主，雖然我細個的時候無咁o既機會，但現在可以的話，都想自己的女可以一嘗心願。
呀豬這對玻璃鞋，明明係唔o岩著，都硬要著去，最尾當然是兩隻腳都著到甩皮，自己受苦…
Phoebe這條裙，其實已經買了兩年，但唔知點解佢都係仍然o岩著.... 唉！
成三十三度，再加酷熱天氣警告，真係燒焦，所以影了這幾張公主之後，大家都唔想再排隊影相了！
去完小小世界，雪糕店剛剛開門，咁難得近來呀豬無咩咳，好啦，一齊食雪糕開心o下啦！
之後就去了期待以久的UFO zone玩水，你睇呀豬玩得幾開心！
Phoebe重古古怪怪系度跳舞，我就換了支長鏡，坐在老遠捕捉兩隻小傻妹。
玩完已經就死，所以一定要去Corner Cafe食下o野同嘆o下冷氣，兩個人都一人一個兒童餐食晒…勁！
雖然我都知你倆個係幸福得滯，但係今日媽媽可以做到比你o既都盡量做到就做，世事o既o野話唔埋，一家人開心o既時間未必你想要就有，點解要在這些地方吝嗇呢？！
我唔想比自己有機會去後悔，我選擇今日就做到最好，希望你倆個小朋友大過以後明白，做人做事都要盡心盡力，做個有用的人！
好開心今年可以請到假，出席所有兩個心肝寶貝的活動，4月15日是Iris第一次的觀課日，見到呀豬上堂都好留心，一o的都唔似平時系屋企大耳牛個樣，而且重成日忍唔住『媽咪，媽咪…』咁做個咀形來向我微笑，我就梗係重開心過佢啦！
呀豬，你乖o的啦，其實媽媽真係好錫你o架！
XoXoXoXxxxx！！！
在班房內見到呀豬副畫貼堂，我梗係要即時影低啦！講真呀豬真係幾有畫畫天份o架！
(自己讚自己個女…嘻嘻！）
