呀豬第二次入院

因為睇開個醫生以為病o左，入養和門疹個醫生開o的藥又唔o岩，晚上食唔到、飲唔到、瞓唔到...終於要再入養和門疹，門疹醫生見咁o既情況都即時叫佢入院...

入到醫院慘就梗係唔洗講，重要無任何痲醉情況下吉針、抽血、抽鼻、照肺、吊葡萄糖...
由於都咳到入唔到o野，所以血管收窄，血又濃，吉o左好多次、又吉第二個位，又吉多幾次，先搵到血管...
呀豬其實份人好頂得痛，但係見到都覺得好可憐！
人o地已經鬼唔唔舒服先入院，重比你o地咁搞法，真係攞命！！！
好彩睇開o既楊醫生一聽到呀豬個名，就記得，重九點幾都嚟多醫院一次睇佢。
每日系張兒童病床就係咁樣，第一日每兩個鐘要聞一次氣、第二日就每三個鐘聞一次，其餘時間就係食藥、探熱、夾手指、去廁所、食o野....
總之係好悶...
記得第一次入院時呀豬好驚個吸氣罩，死都唔肯吸，真係令人又激又傷心，但係呢次已經好熟手，如果唔係瞓咗，次次都可以自己搞掂，不過如果佢扭計時就梗係另計啦！
有時真係悶得滯，無咩好玩，佢就張張床搞高搞底，又喱系床後面唔肯出嚟。
但係一見到醫生就好開心，即時扮到好鬼乖，醫生話咩就咩。
第二日婆婆都有嚟幫手，但係有時人愈多，佢就愈扭計。
好彩只係吊咗一包糖水，因為第二日呀豬已經開始食番好多o野喇，所以話呀豬即係呀豬。
爸爸就梗係要晚晚來探病啦！等我有得逗吓都好啩？！
每次夾手指我都好緊張，因為含氧量要過95先代表個肺好番同正常，如果唔係就唔可以出院，所以每次量完有96、97我都會恭喜呀豬，重同佢握吓隻怪獸手㖭！
好多時佢都會去遊戲角度玩，雖然無咩好o既玩具，但感覺唔似系醫院，所以起碼好過系張病床度。
第二晚呀豬已經瞓得好好，成晚好多個同房小朋友喊佢都無動於衷，見佢瞓到我都安落喇。
其實第一晚入院時發燒外，第二日開始已經退晒燒，如果燒唔退，即係消唔到炎，一定出唔到院，所以真係謝天謝地。

今次入院好彩我可以請假陪佢，其實在小朋友有事時可以有時間陪佢，真係好幸福，以前o個份都唔知係咩鬼工嚟架！！！！