一拖二，在迪士尼乾燒

明知是酷熱警告，但為了不讓兩個小朋友失望，都膽粗粗一拖二去暴曬。
又帶公主裙，又帶泳衣，又帶便服，重有傘、水、小食、鞋、外套、太陽油、相機、鏡頭...

老公話我咁辛苦都唔知為咩，但係我唸我重有幾耐日子可以咁帶佢o地去玩呢？
而且童年好快就過，遲o的你叫佢去陪您出街，我唸都好難，點解唔系自己可以的情況下盡量做多o的？

男人當然係唔會明，個個細路女都會想過自己是公主的時候，尤其喜歡打扮到好似一個小公主，雖然我細個的時候無咁o既機會，但現在可以的話，都想自己的女可以一嘗心願。

呀豬這對玻璃鞋，明明係唔o岩著，都硬要著去，最尾當然是兩隻腳都著到甩皮，自己受苦…
Phoebe這條裙，其實已經買了兩年，但唔知點解佢都係仍然o岩著.... 唉！


成三十三度，再加酷熱天氣警告，真係燒焦，所以影了這幾張公主之後，大家都唔想再排隊影相了！
去完小小世界，雪糕店剛剛開門，咁難得近來呀豬無咩咳，好啦，一齊食雪糕開心o下啦！

之後就去了期待以久的UFO zone玩水，你睇呀豬玩得幾開心！
Phoebe重古古怪怪系度跳舞，我就換了支長鏡，坐在老遠捕捉兩隻小傻妹。


玩完已經就死，所以一定要去Corner Cafe食下o野同嘆o下冷氣，兩個人都一人一個兒童餐食晒…勁！

雖然我都知你倆個係幸福得滯，但係今日媽媽可以做到比你o既都盡量做到就做，世事o既o野話唔埋，一家人開心o既時間未必你想要就有，點解要在這些地方吝嗇呢？！
我唔想比自己有機會去後悔，我選擇今日就做到最好，希望你倆個小朋友大過以後明白，做人做事都要盡心盡力，做個有用的人！

父親節快樂？

今個父親節，係一個有車的父親節，於是父親唯有做埋司機接送大家去四圍玩。

第一站：九龍城 清真牛肉麵

這裏的牛肉餅、牛三併、咖喱…等都是公公婆婆的至愛，去到等了約十五分鐘，坐得又逼，不過好食，都無計啦。

第二站
九龍城單車場

我同兩位小姐各租了一部單車，唸住可以比公公、婆婆同我夫君大人逗逗去行下街，但係結果係我自己搞唔掂自己之餘，更故然係顧唔掂兩位小姐，於是我夫君唯有成為一部人肉推車機...在三十多度的天氣下和晚晚煲國家杯唔夠訓的精神下...乾燒了半小時…

第三站
南蓮園池

去完踏單車，呀豬同Phoebe已經在車睡得很甜，由於公公想去南蓮園池看樹，所以大就在車上等，我同公公去行了一圈。
一邊行，我老豆一邊在講樹講石，看得出他真是很想來，和很喜歡這些充滿中國色彩公園的地方，我問佢點解知得咁清楚，佢話都是在報紙上看的。
好啦！今次算係探路，下次有時間，天氣無咁熱時，同你再來講，慢慢行，慢慢影！

第四站
西貢
去西頁，因為一早唸o左帶大家去這間我幾鍾意的餐廳試下。不過我次次來都是食Lunch，今次先第一次食Dinner，價錢就梗係差好遠，不過都可以接受，而且都算幾好食，話晒都係父親節，無理由去食Pizza Hut或者麥當勞卦？！









當然亦順度去行下西貢用三舨賣海鮮的海邊，行下盧冠庭間舖頭，同玩下公園內的遊樂設施。
去到海邊的海鮮酒家時，只係唸到兩個terms ：『掠水』同『殘忍』，我當然借此向Phoebe講解環保的重要性。
這張相的背後，其實是一個養了鯊魚的魚缸，公公經常同兩位玩扮鯊魚遊戲，當然要在此與真鯊魚合照一張！

總括全日來講，其實是兒童節、或公公節，怎樣也算不上是父親節，我可憐的夫君大人，我真係對你唔住... >_<

第二次住迪士尼酒店

今次已經是第二次住迪士尼酒店了，主要原因都係因為有半價入住的關係，亦因為咁，所以多人到爆！
從來都未試過Prince Eric Room的Activity會全場爆滿，重要等第二輪先有得坐...
成個泳池人山人海...見到都唔想去游...
等滑梯要起碼等五、六個人先可以有得玩...
不過今次最唔同的，當然是有部大機，可以去玩影相。
兩位小姐的造型我一早已經預備好，呀豬訓醒午覺後，我已經燙好靚裙，可以去玩戶外人像攝影了！

兩個睇起上黎真係好似大細S，好搞笑呀！
今次影得都幾滿意，有幾張可以見得人，好開心今年學會了影相，多謝師傅科學家同事一直教我，現在真係覺得其實唔洗比錢人，都可以幫自己小朋友影得好靚的！！！

大海濱公園：踏三輪車、騎馬仔

無唸過會去咁遠，匆匆忙忙出門口，相機無帶，蚊怕水又無帶…
好彩部手機都可以影得下，唔算差，但就影少好多靚相了！

成五十五蚊(講價後)先可以借一個小時，四個人一架車，好彩都算可以，一邊坐著爸爸踏的車，一邊看公園的風景、海邊，不時傳來陣陣花香、蟬嗚... Phoebe、呀豬，你兩個真係好幸福呀！
你o地一定要記住要乖乖地呀，唔好激爸爸媽媽，努力學習，相親相愛呀...！




去到盡頭，有個『水陸墟』，拍張照留念先。
這裏有得玩騎馬仔，十分有趣，每人$20可玩8分鐘，兩個小朋友都話好好玩，又好！




呀豬玩完食完飯後，一邊行一邊想合埋眼訓覺…好可愛又好得人驚，真係唔想叫你呀豬都唔得！
^.^

"In to the DEEP" 3D IMAX 電影

買o左架車後，真係多o左好多family outdoor activities，今個星期日就先去了Mega Box，看"觸摸海洋秘境"的3D IMAX電影。
這套電影特別的地方，是很難可以在網上看到有得做同有飛賣，就算去Cityline或UA的網站都是很難可以找到有這套電影的，我前幾日就是負仆仆碌碌的想看看Prince Caspian幾時上畫時，找到這電影是逢星期日的早上十點有一場，幾日後再找、找、找，同樣方法再找、找、找…都已經找不到了！！！


可幸的是應該有一個媽媽在幾日前網上還有得網上售票時訂了兩張票，和仔仔來看，所以才可以開畫，我知道得咁清楚的原因是，當日我們看戲時，就只有這兩母子和我們一家在這所五層樓高的IMAX Theater 中看3D電影！

雖然在迪士尼已看過很多次4D動感米奇，但今次這個看海洋奇觀的電影真是十分好看，活生生的就像真的是已進入了海底世界，清、迫真，比起看太空館的全天域電泉更加震撼！雖然只是短短三十五分鐘，我也覺得能帶小朋友有這一次難忘的經歷，十分值得！


看完戲後，一家人去了太興食早餐，未開始有o野食之前，Phoebe已經急不及待的在她帶來的notebook上寫下感想送給我：
我看後梗係好開心啦，呀豬見Phoebe寫notes，又寫了以下這篇給我：

不過這是呀豬的專用文字，經專家(即佢自己)解譯後，內容是說明好開心可以睇到好多魚，好好睇，多謝媽媽、爸爸！

希望你o地兩個記得這個經驗，以後更有興趣研究和愛護大自然世界，因為我怕就算我想再買多次飛去睇這套戲，都未必可以再買到...！